لانك تتحمل!!
احنا عندنا مبدأ وقناعة غريب أوي في علاقاتنا مع الناس.. مبدأ ممكن يدمر أقوى العلاقات
مبدا يدمر اقوى العلاقات اللي مبنية من سنين و سنين..
مبدأ " طالما استحملت مرة يبقي استحمل وشيل طول عمرك و انت ساكت ".
في ناس لو لقوا حد بيحبهم ييجوا عليه و يزهقوه معاهم و يطلعوا عينه عشان عارفين انه بيحبهم فا هيسكت ويستحمل ...فا عادي يسيبوه زعلان، يخبط دماغه في الحيط.
لأنك تتحمل!!
في مديرين في الشغل لو لقوا موظف بيحب الشغل و متفاني فيه، يطلعوا عينه ويشيلوه شغل فوق طاقته، لمجرد انه ساكت . وبيستحمل !! مش انت بتحب شغلك شيل بقي!! بيشيلوه شغل 5 موظفين معاه طالما عمره ما قال لأ!! يخلوك تكره الشغل حتي لو كنت مبدع فيه و حتي لو كان أكتر حاجة بتحبها!!
لأنك تتحمل !!
في ناس لو زعلوك و لقوك عديت الموضوع و كبرت دماغك، يسوقوا فيها. بيفتكروا ان طالما عديت الموقف ده هتعدي اي حاجة غيره و مش من حق تزعل و لا تعاتب!! بدل ما يقولوا ده انسان محترم و شارينا!!
لحد متكره حياتك معاهم، وغصب عنك تاخد قرار وتخرجهم من حياتك للأبد، ومهما حاولوا يراضوك بعدها عشان ترجع تحبهم زى مكتت متقدرش، وبيحسوا وقتها انهم بيتعاملوا مع حد تانى، عمرهم معرفوه قبل كده شخص قاسى، مبيسامحش ابدا ولا بيقبل اعزار، لانهم ببساطه حطموا فيه كل اشكال الطيبه واستنفذوا مرات التسامح
وكانوا سبب فى ايام صعبه كتير عاشها لوحده لحد ماتعافى منهم ومبقاش ليهم لازمه، اياكم وقسوة الطيبين بتكون قلوبهم اجمد من الحجارة.
لأنك تتحمل!!
لو زوج أو زوجة شالوا مسئولية كل حاجة من الأول ساعات الطرف الثاني بيتمادي و يشيل ايده خالص من الليلة و يبقي متفرج بس و الطرف الثاني بيدور في الساقية لوحده..
بدال عرفت تشيل مرة يبقي شيل الشيلة كلها لوحدك على طول!!!
إحنا بنفني حياتنا بنحاول نرضي ناس مش معترفين بينا حتى.
اللي بيستحمل حد أو حاجة بدافع الحب و الاخلاص و الولاء مش لازم نكرهه فيها بعدم تقديرنا..
مش لازم نقطم وسطه أو نتعب نفسيته.
مش لازم نخليه يندم علي طيبة قلبه و دماغه الكبيرة و احتوائه للغير..
مفيش حاجة اسمها ده غلبان و بيسكت فا آجي عليه براحتي و أطلع روحه براحتي..
الناس اللي بتقرفوها دي هيسيبوكوا لو مش انهارده فا أكيد بكرة لان كل انسان و ليه طاقة!
كل انسان و ليه طاقة والله العظيم مهما كان بيحبكوا و مهما كان شاريكوا ...
ما تخسروش أحسن و أنضف ناس في حياتكوا عشان ضامنين حبهم..لإن غالباً هتصحوا في يوم هتلقيهم قرروا يمشوا و ما يرجعوش تاني مهما عملتوا..
إرسال تعليق